TRADUKITA POEZIO‎ > ‎

M. Ju. Lermontov

 

 

M. JU. LERMONTOV

Traduko de Tatjana Auderskaja

 

DANKO

Pro ĉio dankas Vin mi malavare:

Pro la sufer’ kaŝita de l’ anim’,

Venen’ de l’ kiso kaj de larm’ amaro,

Venĝ’ de fremdul’, amika kalumni’.

 

Pro la anim’, dezerte pereinta,

Pro ĉiu fals’ en tiu tera viv’.

Kaj nun nur tion faru vi,  Kreinto,

Ke mi ne longe plu dankadu Vin.

 

ANĜELO

Kun kanto tenera tra nokta ĉiel’

Serene flugadis anĝel’.

Kaj luno, kaj steloj, kaj blanka nubar’

Aŭskultis la kanton kun kar’.

 

Li kantis pri viv’ en beata ĝarden’

En bela senpeka Eden’,

Pri Dio eterna, kaj sonis ador’

En voĉ’ kun sincera fervor’.

 

Li portis animon por tera ekzist’,

Por vivo en larmoj kaj trist’;

Sed restis memor’ en la juna anim’

Pri l’ kant’ de ĉiela sublim’.

 

Ĝi longe suferis senvorte sur ter’,

Strebante al stranga mister’,

Kaj l’ kanton ĉielan, gardatan en kor’,

Ne venkis enua viv-ĥor’. 

Comments